မုန်းစွဲ

မုန်းစွဲ သည် ၂၀၁၈ ခုနှစ်တွင် ရုံတင်ပြသခဲ့သော ဘာသာရေး ဒရမ်မာ ရုပ်ရှင်ဇာတ်ကားကြီး ဖြစ်သည်။ ဒါရိုက်တာ ဩရသ ရိုက်ကူးပြီး နေတိုး၊ မင်းသွေး၊ ဖွေးဖွေး၊ ကျော်ကျော်ဗိုလ်၊ အေးဝတ်ရည်သောင်း တို့က အဓိကပါဝင်သရုပ်ဆောင်ပြီး၊ ဇွဲဝေယံထူး၊ ဇွဲဝေယံထက် အမွှာ ကလေးသရုပ်ဆောင်နှစ်ဦးက အားဖြည့်ထားသည်။ မုန်းစွဲဇာတ်ကားသည် မြန်မာနိုင်ငံ၏ ဝင်ငွေအများဆုံးရုပ်ရှင်ကားများအနက် တစ်ခုအပါအဝင် ဖြစ်လာခဲ့သည်။ ၂၀၁၈ ခုနှစ်၊ နိုဝင်ဘာလ ၁၆ ရက်နေ့တွင် မြန်မာနှင့် စင်ကာပူ နိုင်ငံများတွင် တပြိုင်နက် စတင်ပြသခဲ့သည်

ဇာတ်ကြောင်း

ဤဇာတ်ကားကို နာမည်ကျော် ဓမ္မကထိက ဆရာတော် အရှင်ဆန္ဒာဓိက (ရွှေပါရမီတောရ) ဟောကြားပြီး စာအုပ်အဖြစ်ပါ ထုတ်ဝေထားသည့် အသေလှတဲ့သူ တရားတော်မှ ဇာတ်လမ်းတစ်ပုဒ်ကို အခြေခံကာ ရိုက်ကူးထားသည်။ ဘာသာရေးဆိုင်ရာ အသိပညာပေးဇာတ်ကားဖြစ်သည့်အပြင်၊ ဗုဒ္ဓတရားတော်နှင့် ပတ်သက်သည့်အချက်အလက်များစွာ ပါဝင်ကာ၊ အမုန်းတရားကို စွဲလမ်းခြင်း၏ ဆိုးကျိုးအပြစ်တို့ကို ပုံဖော်ပြသထားလေသည်။ ယခင်ဘဝက လူဆိုးလူမိုက် လူရမ်းကားညီအစ်ကို ထူးဇော် (နေတိုး) နှင့် တူးမော် (မင်းသွေး) တို့က လူအများကို ဒုက္ခများ ပေးခဲ့သည်သာမက မသည်းအုံ (ဖွေးဖွေး) ကို ဘဝပျက်ကာ အရှက်ရသည့်အပြင် သူမမိခင်ကို သတ်၊ သူမ၏ ချစ်သူ ကိုဖိုးအောင် (ကျော်ကျော်ဗိုလ်) တို့ကို ဒုက္ခိတဖြစ်အောင် နှိပ်စက်ပြီး၊ အသေဆိုးဖြင့် သေလွန်ကာ ယခုဘဝတွင် ကိုဖိုးအောင်နှင့် မသည်းအုံတို့ လင်မယား (သူတို့လက်ထပ်လိုက်ကြသည်) ထံတွင် အမွှာညီအစ်ကိုအဖြစ်မွေးဖွားလာရမှ၊ ရဟန်းနှစ်ပါး (နေတိုး နှစ်ကိုယ်ခွဲ) ဖြစ်သည့်တိုင် ဘဝဖြစ်ရပ်အစုံစုံကို ဖော်ပြထားပြီး၊ ဗုဒ္ဓတရားတော်ပါ သံသရာစက်ဝန်းသဘောဖြင့် သုံးသပ်ကာ အချင်းချင်း ယခင်ဘဝများက အမုန်းတရားများ ကင်းစင်ကာ လှပစွာ ဇာတ်သိမ်းထားသည်။

သရုပ်ဆောင်များ

• ယခင်ဘဝက ထူးဇော်၊ ယခုဘ၀ ရဟန်းနှစ်ပါး (နှစ်ကိုယ်ခွဲရိုက်ကူးမှု) အဖြစ် နေတိုး
• ကိုဖိုးအောင်အဖြစ် ကျော်ကျော်ဗိုလ်
• ယခင်ဘဝက တူးမော် အဖြစ် မင်းသွေး
• မသည်းအုံ အဖြစ် ဖွေးဖွေး
• ယခင်ဘဝက မကြာဥ၊ ယခုဘ၀ မသိင်္ဂီ အဖြစ် အေးဝတ်ရည်သောင်း
• အမွှာကိုရင်နှစ်ပါးအဖြစ် ဇွဲဝေယံထူး ၊ဇွဲဝေယံထက်