ကြောက်ကြောက်ကြောက်

သူခိုးတစ်ယောက်အား ကံစွပ်ကာ ဖမ်းမိပြီးနောက် ဖိုးသံလုံးအား ရွာသစ်ရွာ တစ်ရွာလုံးက လူစွမ်းကောင်းဟု ထင်နေသည်။ တကယ်တမ်းမူ ဖိုးသံလုံးမှာ လွန်စွာကြောက်တတ်သူ ဖြစ်သည်။ မင်းညိုမှာ ချောင်းတစ်ဖက်ကမ်းရှိ ထနောင်းပင်ရွာမှ တမာ၏ ချစ်သူ ဖြစ်သည်။ သရုပ်ဆောင် ကျော်ကြားနှင့် မယ်မဒီ ပါဝင်သည့် သရဲကားရိုက်သူများ ရွာသို့ ရောက်လာသည်။ လက်ထပ်ပြီးစ ဇနီးမောင်နှံ ခေတ်ကောင်းနှင့် စိမ့်စမ်းတို့မှာ ခေတ်ကောင်း၏ သူငယ်ချင်းနှစ်ယောက်နှင့်အတူ ပျားရည်ဆမ်းခရီး ထွက်လာသည်။

အဖြေပေးရန် သာယာက ဖိုးသံလုံးအား ရွာအနောက်ဖျားကွင်းစပ်သို့လည်းကောင်း၊ အိမ်ကသဘောတူသူနှင့် မယူလို၍ လာခိုးရန် တမာက မင်းညိုအား ချောင်းကမ်းစပ်သို့လည်းကောင်း၊ ညခန်းရိုက်အပြီး လာကြိုရန် မယ်မဒီက ကျော်ကြားအားလည်းကောင်း အသီးသီး ချိန်းကြသည်။

သူငယ်ချင်းများအား စလို၍ ဗြောက်အိုးကို ကားတွင်း၌ ခေတ်ကောင်းက ဖောက်သည်။ ကားရှေ့ပိုင်းအောက် ဗြောက်အိုးဝင်ကာ ကား မီးစွဲပေါက်ကွဲသည်။ ခေတ်ကောင်းသာ အသက်ရှင်သည်။ လမ်း၌ မြွေကိုက်ကာ အဖြေပေးရန်လာသည့် သာယာ သေသည်။ အခန်းထဲ၌ ပိတ်ထား၍ တမာက အဆိပ်သောက် သေသည်။ ကြိုးဆွဲချသည့် ဇာတ်ဝင်ခန်းရိုက်ရင်း မတော်တဆဖြစ်ကာ မယ်မဒီ သေသည်။ ချိန်းထားသည်ကို စွဲကာ သာယာ၊ တမာ၊ မယ်မဒီနှင့် စိမ့်စမ်းတို့၏ ဝိညာဉ်များက သက်ဆိုင်သူများထံ ထိုဘဝနှင့် သွားတွေ့သည်။

ကြောက်၍ ပြေးရင်း တောထဲ၌ ဖိုးသံလုံး၊ မင်းညို၊ ကျော်ကြားနှင့် ခေတ်ကောင်းတို့ ဆုံကြသည်။ သုဿာန်၌ နေသည့် ပယောဂဆရာထံ လေးယောက်သား ရောက်သွားသည်။ သာယာတို့ လိုက်လာသည်ကိုပယောဂဆရာက ဟန့်နှင်လိုက်သည်။ ခြေဦးတည့်ရာသွားသည့် သာယာတို့မှ အမျှရ၍ ကျွတ်သည်။

တကယ်တမ်းမူ ပယောဂဆရာမှာလည်း သေပြီးသူ ဖြစ်သည်။ ဖိုးသံလုံးတို့ ထပ်ပြေးကြရာ လမ်းကူးစဉ် မင်းညို၊ ကျော်ကြားနှင့် ခေတ်ကောင်းတို့ကို ကားတိုက်သည်။ ၎င်းတို့ မည်သို့မျှ မထိခိုက်။ ထိုအခါမှသာ မင်းညိုသည် ရေနှစ်၍လည်းကောင်း၊ ကျော်ကြားသည် ချောက်ထဲကျ၍လည်းကောင်း၊ ခေတ်ကောင်းသည် ကားပေါက်ကွဲ၍လည်းကောင်း သေပြီးသူများမှန်း သတိရလာသည်။ ဖိုးသံလုံး အမျှဝေ၍ ထိုသုံးယောက် ကောင်းရာရောက်သည်။ ဝမ်းနည်းကာ ပြန်လာသည့် ဖိုးသံလုံးမှာ လမ်း၌ ငုတ်စိုက်နေသည့် သူ့အလောင်းအား တွေ့သည်။ သို့မှသာ သူသည်လည်း သာယာဝိညာဉ်နှင့် တွေ့ကာ ကြောက်ပြေးရင်း ငုတ်စိုက်သေပြီးမှန်း သိသွားတော့သည်။

#ကြောက်ကြောက်ကြောက် #MyanmarMovies #မြန်မာဇာတ်ကားများ #Online #Games #Myanmar #OnlineGamesMyanmar

• ကြောက်ကြောက်ကြောက်