တီတီနှင့်ဒိုးနတ်

‘တီတီနှင့် ဒိုးနတ်’ ဇာတ်ကားဟာ မြန်မာသရုပ်ဆောင်မင်းသား ပြေတီဦးနဲ့ ထိုင်းမင်းသမီးချောလေး Chattarika Sittiprom တို့ ထူးထူးခြားခြား တွဲဖက်ရိုက်ကူးထားတဲ့ ဇာတ်ကားလေးပဲ ဖြစ်ပါတယ်။ ရိုက်ကူးထားတဲ့ နေရာကလည်း ထိုင်းနိုင်ငံမှာပါ။

ပါဝင်တဲ့ သရုပ်ဆောင်တွေကလည်း ပြေတီဦး ရွှေသမီးတို့ကလွဲရင် အကုန်လုံးက ထိုင်းနိုင်ငံရဲ့ သရုပ်ဆောင်တွေပါပဲ။ ရိုက်ကူးထားတဲ့ ဒါရိုက်တာကလည်း
ထိုင်းနိုင်ငံရဲ့ နာမည်ကြီး ဒါရိုက်တာ Adsajun Sattagovit ပဲ ဆိုတော့ ဒီဇာတ်ကားလေးက ရုပ်ရှင်ချစ် ပရိသတ်တွေအတွက် ခံစားမှုအသစ်တွေ
အမြင်သစ်တွေ ရသသစ်တွေ ပေးစွမ်းနိုင်တာကတော့ အသေအချာပါပဲ။

တီဦးဆိုတဲ့ ကောင်လေးက သူ့ညီမဆီက လိမ်ညာယူသွားတဲ့ သူတို့ မိသားစုရဲ့ ဘိုးဘွားပိုင် ရတနာ လက်စွပ်ကို ပြန်လည် ရှာဖွေဖို့ ထိုင်းနိုင်ငံကို ရောက်လာတယ်။
သူ့ ညီမဆီက လိမ်ညာ ယူသွားတဲ့ သူကလည်း ထိုင်းနိုင်ငံမှာ လုပ်ငန်းရှင်ယောင်ဆောင်ပြီး ရုပ်ကလေး သနားကမားနဲ့ လိမ်လည်နေတဲ့ ‘ကောင်း’ ဆိုတဲ့ သူပဲ ဖြစ်ပါတယ်။
အခု ‘ကောင်း’ က ထိုင်းနိုင်ငံရဲ့ မားဖီးယား ဂိုဏ်းခေါင်းဆောင်ရဲ့ သမီးဖြစ်တဲ့ ဒိုးနတ်နဲ့ စေ့စပ်ပွဲလုပ်ဖို့ ပြင်ဆင်နေပါပြီ။
ဒိုးနတ်က ကောင်း ကို လုံးဝ မချစ်ပါဘူး။ လက်လည်း မထပ်ချင်ပါဘူး။ ကောင်း က လိမ်ညာပြီး ရွှေတွင်းလုပ်ငန်းတွေအကြောင်းပြပြီး ဒိုးနတ်ရဲ့ အဖေ မာဖီးယားဂိုဏ်းခေါင်းဆောင်ကို မြူဆွယ်ပါတယ်။
သူ့သမီး ဒိုးနတ်နဲ့ လက်ထပ်ပေးမယ်ဆိုရင် ဒီ လုပ်ငန်းတွေကို သူ့အဖေနဲ့ အတူ လက်တွဲလုပ်မယ်လို့ ဖြားယောင်းလိုက်တာကို အဖေဖြစ်တဲ့ လူဆိုးခေါင်းဆောင်ကြီးကလည်း ယုံကြည်ပြီး
သူ့သမီးဒိုးနတ်ကို ကောင်း နဲ့ အတင်း လက်ထပ်ဖို့ နားချပါတယ်။

ဒိုးနတ်ကလည်း ဂျစ်ကန်ကန် နဲ့ လုပ်ချင်ရာ လုပ်တဲ့ သူမျိုးဆိုတော့ အမျိုးမျိုး ပြဿနာ ရှာပါတယ်။ အမှန်က ကောင်းကလည်း ဒိုးနတ်ကို တကယ်ချစ်လို့ လက်ထပ်ချင်တာ မဟုတ်ပါဘူး။
ကောင်း က မိန်းကလေးပေါင်း များစွာနဲ့ ရှုပ်ပွေနေတဲ့ လူရှုပ်လူပွေ တစ်ယောက်ဆိုတော့ ဒိုးနတ် အဖေရဲ့ အရှိန်အဝါနဲ့ သူ လုပ်ချင်တာတွေ လုပ်ခွင့်ရအောင် ဒိုးနတ်နဲ့ လက်ထပ် ချင်နေတာပါ။
သူတို့ နှစ်ယောက်ရဲ့ လက်ထပ်ပွဲမှာ ကောင်း က တီဦး ညီမဆီက လိမ်လည် ယူလာတဲ့ လက်စွပ်ကို ဒိုးနတ်ကို ပေးဖို့ လုပ်ပါတယ်။
ဒါကို တီဦးက မယောင်မလည်နဲ့ လာပြီး ဓာတ်ပုံတွေ ရိုက်ထားပါတယ်။ သူ့ ရည်ရွယ်ချက်ကလည်း သူတို့ ဘိုးဘွားပိုင် လက်စွပ်ကို ပြန်လည် ရယူဖို့ပဲလေ။
မမျှော်လင့်ဘဲ ဒိုးနတ်က သတို့သမီးဝတ်စုံကြီးနဲ့ တီဦးကို ဓားစာခံလုပ်ပြီး မင်္ဂလာပွဲကနေ ထွက်ပြေးဖို့ ကြိုးစားခဲ့ပါတယ်။
ဒိုးနတ်သူငယ်ချင်း နေတဲ့ နေရာရောက်တော့ တီဦးကို ပြန်လွှတ်ပေးခဲ့ပါတယ်။
နောက်တစ်နေ့မှာ ဒိုးနတ်နဲ့ သူ့ သူငယ်ချင်း ဆိုင်တစ်ဆိုင်မှာ ထိုင်နေတုန်း သူ့အဖေ တပည့်တွေက လိုက်ဖမ်းတော့ တီဦး ထပ်ဆုံကြပြန်ပါတယ်။
တီဦးကလည်း ဒိုးနတ်ကို ကယ်ထုတ်ဖို့ လုပ်ရင်း ဒိုးနတ် နံရံစောင်းနဲ့ တိုက်မိပြီး သတိလစ်သွားလို့ ထမ်းပြီး ပွေ့ချီလာခဲ့ရပါတယ်။

ဒိုးနတ် သတိရလာတဲ့အချိန်မှာတော့ သူ့ကိုယ်သူ မေ့သွားပြီး တီဦးနောက်ကနေ တကောက်ကောက် လိုက်ပါတော့တယ်။ ဘယ်လိုမှ ရှောင်လို့ မရတဲ့အဆုံး
တီဦးက သူနဲ့ အတူတူ နေပြီး အလုပ်လုပ်ကြတဲ့ ဂျယ်လီတို့ အုပ်စုဆီ ဒိုးနတ်ကို ခေါ်လာခဲ့ပါတယ်။
သူ ဘယ်လိုပဲ ဒိုးနတ်ကို စွန့်ပစ်ပါစေ ဒိုးနတ်ကတော့ တီဦးကို လုံးဝ ခွာမပေးပါဘူး။ နောက်ဆုံး တီဦးလည်း ချစ်စရာကောင်းပြီး ဘာမှ မသိ နားမလည်ဘဲ
သနားစရာကောင်းနေတဲ့ ဒိုးနတ်ကို မေတ္တာစစ်နဲ့ ချစ်မိခဲ့ပါတယ်။

မြန်မာနိုင်ငံသားလေးကတော့ သူ့ ဌာနေ ဖြစ်တဲ့ ရန်ကုန်မြို့လေးကို သူ့ ကိစ္စတွေ ပြီးဆုံးရင် အပြီး ပြန်ရမဲ့သူပါ။
ဒိုးနတ်ဆိုတဲ့ မားဖီယား ခေါင်းဆောင်သမီး ထိုင်းနိုင်ငံသူလေးကလည်း သူမလေးရဲ့ နိုင်ငံမှာပဲ နေထိုင်ပြီး သူမ အဖေ သဘော တူတဲ့သူနဲ့ လက်ထပ်ရမှာပါ။
ဘယ်လိုမှ ပေါင်းစုံရန် မဖြစ်နိုင်တဲ့ လူနှစ်ယောက်ကို နှလုံးသားချင်းရော ဘဝချင်းပါ နီးစပ်ဖို့အတွက် ပေါင်းကူးပေးနိုင်တာကတော့ ချစ်ခြင်းမေတ္တာမှ အပ ဘာမှ မဖြစ်နိုင်ပါ။

‘တီတီနဲ့ ဒိုးနတ်’ ဆိုတဲ့ ဇာတ်ကားလေးကတော့ ချစ်ခြင်းမေတ္တာ၊ အက်ရှင် ပေါင်းစပ်ထားတဲ့ ထူးထူးခြားခြား ရသမျိုးနဲ့ ပရိသတ်ရင်ထဲကို
အရောက်သွားနိုင်မယ့် ဇာတ်ကားကောင်းလေးဆိုရင်လည်း မမှားပါဘူး။
ထိုင်းနိုင်ငံရဲ့ အလှအပတွေ၊ ပတ်ဝန်းကျင်တွေ၊ ထိုင်းလူမျိုးတွေရဲ့ အပြုအမူတွေ အပြောအဆိုတွေ
နေထိုင်မှုတွေနဲ့ စိတ်ဝင်စားစရာအပြည့် ရိုက်ကူးနိုင်တဲ့ ‘တီတီနဲ့ ဒိုးနတ်’ ဇာတ်ကားလေးကို ခံစားကြည့်ကြပါဦးနော်…

• တီတီနှင့်ဒိုးနတ်